ماشيين

و السما بعيدة قريبة ، ملهاش آخر ،

يوم زرقا و التانى فضى ،

وأنا وانت ماشيين مش شايفين لا آخر لطريقنا و لا آخر للسما ،

أنا و انت ماشيين مش مروحين .. 

فيها إيه لو نمشى سوا فى طريق السما ؟

و نرمى ورانا ورد و ياسمين ،

عشان لما السما تغير لونها تسقيه و الناس تعرف خطاوينا ،

يمكن ، يمكن يتعلموا إن الحب عمره ما كان عيب ، 

خلينا فرحانين ، من فضلك ..

أنا بفرح معاك ،

بتوتر ، 

ووشى بيقلب ألوان ،

لو سمحت عدينى الشارع ،

قوللى إنى حلوة و اشتريلى شوكلاتة و اوعى ..

اوعى تقوللى كلام حب ،

خلينا كدة مشايين مش عارفين ،

لا آخر السما و لا نهاية الطريق ..

فى خيالى

1- حستناك وقت الغروب كل يوم فى خيالى ، بنشرب الشاى و مشغلين فيلم أجنبى أهبل و بنضحك على ألشة رخيصة أو تعبير وش عبيط أو حتى إنه من الغريب إن إحنا لسة سوا .. بص ، إحنا حنضحك و خلاص ، هو خيالى بيقول كدة !

2- زبادو و ليل و إعجاب مدفون ليك ، يبدأ يظهر و يفتح زى الورد أول ما الشتا و السقعة و الأحاسيس الدافية تمطر ، و تبقى انت أجمل حاجة بيصحيها الشتا جوايا و تانى أولوية بعد ماشتر بالطو جديد !