بتحب شاى الخوخ؟ الكراميل؟ طب البرغموت؟
طب بتحب السياسة؟ بتهتم بالإنسانية والعمل التطوعى؟
ليك فى الرسم والجرافيتى؟ بتقدر الفن والجمال وسعاد حسنى ورستم؟
أنا ميهمنيش الكلام الكتير اللى هتقوله ،
يهمنى إنك مهتم ،
المدينة دى واسعة وأنا مبينة شعرى، هتوافق تمشى فى شوارعها مع بنت بشعرها؟
يعنى مش شايف إنى عيب؟
طب ما تيجى نروح محطة الرمل ناكل فشار ، نقعد فى تياترو و نركب الترام اللى بدورين..
أنا عايزاك تبقا بتحب البلد زيى و بتحبنى أكتر من البلد ومفيش مشاكل لو بتحب أمك أكترمننا كلنا،
أنا كنت مدفونة من قبلك ، كنت عاملة زى سيجارة كليوباترا مليش لازمة!
بس أنا فى الأساس kent خلى بالك!
طب ماتيجى نشرب نسكافيه و أكلمك بمنتهى الصراحة عن رعبى الشديد من الرجالة!
أو أعرفك على صحابى البنات وتتنفخ من غيرتهم منك ، هينفخوك يا عمرى،
تعالى أوديك كنيسة مع مارى وناردين ونولع شمعة لمصر و شمعية لينا،
وفكك من إنك تبقا عندى على الفيس بوك عشان إحنا مش صحاب إحنا أكتر..
طب ماتيجى نتصور عند أى حجر على البحر من اللى مكتوب عليهم "أترضاه لأختك؟"
أو نقعد على التجارية وتحطلى manicure
بقولك إيه.. ما تيجى أحبك؟
No comments:
Post a Comment